சவுதியில் பிறப்பு-இறப்பு சான்றிதழ், மருத்துவ அறிக்கைக்கு கட்டணம் கூடாது! - எச்சரிக்கும் அதிகாரிகள்
melcorahim 
ரியாத்:சவுதி அரேபியாவில் மருத்துவ அறிக்கைகள், பிறப்புச் சான்றிதழ்கள் மற்றும் இறப்புச் சான்றிதழ்கள் போன்ற மின்னணு சேவைகளுக்கு கட்டணம் வசூலிக்கப்படுவதற்கு எதிராக எச்சரிக்கை விடுக்கப்பட்டுள்ளது. இது தொடர்பாக நாட்டிலுள்ள அனைத்து சுகாதார நிறுவனங்களுக்கும் கடுமையான அறிவுறுத்தல்கள் வழங்கப்பட்டுள்ளன.
நோயாளிகளிடம் மின்னணு சேவைகளுக்கு தனி கட்டணம் வசூலிக்கப்படுவதில்லை என்பதை உறுதி செய்வதற்காக சுகாதார அமைச்சக அதிகாரிகள் நாடு முழுவதும் உள்ள மருத்துவமனைகளை ஆய்வு செய்து வருகின்றனர். சில மருத்துவமனைகள் சட்டத்தை மீறுவது சோதனையில் கண்டறியப்பட்டுள்ளது. இந்த மருத்துவமனைகளுக்கு எதிராக சட்ட நடவடிக்கை எடுக்கப்பட்டது.
மருத்துவ விடுப்பு சான்றிதழ்கள், மருத்துவ அறிக்கைகள், பிறப்பு சான்றிதழ்கள், இறப்பு சான்றிதழ்கள் போன்றவற்றுக்கு கட்டணம் வசூலிக்கப்படுகிறதா என்பதை சரிபார்க்கும் செயல்முறை வரும் நாட்களில் தொடரும். மருத்துவமனைகளால் ஏதேனும் மீறல்கள் காணப்பட்டால் 937 என்ற எண்ணுக்கு தொடர்பு கொண்டு அதிகாரிகளுக்கு அறிவிக்குமாறும் சுகாதார அமைச்சகம் பொதுமக்களை கேட்டுக் கொண்டுள்ளது.
