அமீரகத்தில் இன்று முதல் புதிய தொழிலாளர் சட்டம் அமல்!

ஐக்கிய அரபு அமீரகத்தில் வீட்டுப் பணியாளர்களை ஆட்சேர்ப்பு மற்றும் விசா மோசடி மற்றும் சுரண்டலில் இருந்து பாதுகாக்கும் புதிய தொழிலாளர் சட்டம் இன்று முதல் (டிச.15) அமலுக்கு வருகிறது.

புதிய தொழிலாளர் சட்டத்தின்படி ஆட்சேர்ப்புக்கு முன், வேலையின் தன்மை, சம்பளம் மற்றும் பிற சலுகைகள் குறித்து வீட்டுப் பணியாளர்களுக்குத் தெரிவிக்க வேண்டும். விசா அல்லது பயணச் சீட்டுக்காக முகவர், முதலாளி அல்லது இடைத்தரகர்களிடம் பணியாளர்கள் பணத்தைச் செலுத்த வேண்டாம். உங்களுக்கு வாக்குறுதியளிக்கப்பட்ட வேலை அல்லது சம்பளம் கிடைக்கவில்லை என்றால், நீங்கள் திருப்பி அனுப்பும்படி கேட்கலாம்.

வீட்டு வேலை செய்பவர்களின் அடையாள ஆவணங்களை முதலாளி மறைக்கக் கூடாது. பாஸ்போர்ட், எமிரேட்ஸ் ஐடி போன்ற தனிப்பட்ட ஆவணங்களை தொழிலாளர்கள் வைத்திருக்க வேண்டும். வீட்டு வேலையாட்களை மரியாதையுடன் நடத்த வேண்டும். அவர்களைத் தாக்கக் கூடாது. பணியமர்த்தல் நிறுவனம், தொழிலாளிக்கு சரியான ஊதியம் வழங்கப்படுவதை உறுதி செய்ய வேண்டும்.

தொழிலாளர் தகராறு ஏற்பட்டால், மனிதவள மற்றும் உள்நாட்டுமயமாக்கல் அமைச்சகத்தை அணுகலாம். ஒப்பந்தப் பணிகளில் தவறு இருக்கக் கூடாது. சரியான காரணம் இல்லாமல் வேலையை விட்டு நிறுத்தக் கூடாது. பணியிட தனியுரிமையை மதிக்கவும் மற்றும் முதலாளியின் சொத்து மற்றும் உபகரணங்களைப் பாதுகாக்கவும் வேண்டும்.  ஒப்பந்த முதலாளி அல்லாது வெளியே சென்று வேலை செய்யக் கூடாது.

பணியின் போது இறக்கும் வீட்டுப் பணியாளர்களின் வாரிசுகளுக்கு மாதச் சம்பளம், நிலுவைத் தொகை மற்றும் சேவைப் படிகள் வழங்கப்பட வேண்டும். ஸ்பான்சரின் செலவில் இறந்த உடலை வீட்டிற்கு கொண்டு சேர்க்க  வேண்டும். மீறும் ஆட்சேர்ப்பு முகவர் மற்றும் முதலாளிகளுக்கு ஓராண்டு வரை சிறைத்தண்டனையும் ரூ. 22.4 கோடி (1 கோடி திர்ஹம்) வரை அபராதமும் விதிக்கப்படும்.

தவறான தகவல் மற்றும் போலி ஆவணங்களை வழங்குவோருக்கு 20,000 முதல் 100,000 திர்ஹாம்கள் வரை அபராதமும் 6 மாதங்கள் வரை சிறைத்தண்டனையும் விதிக்கப்படும். உரிமம் இல்லாமல் வீட்டுப் பணியாளர்களை பணியமர்த்துவது, குறிப்பிட்ட வேலை அல்லது முறையான ஊதியம் வழங்காதது அல்லது பிற நோக்கங்களுக்காக அவர்களைப் பயன்படுத்தினால் 2 லட்சம் திர்ஹம் வரை அபராதம் விதிக்கப்படும்.

18 வயதுக்குட்பட்ட நபர்களை சட்டவிரோத செயல்களுக்கு பணியமர்த்துதல், தூண்டுதல், தலைமறைவு, தங்குமிடம் அல்லது பயன்படுத்துதல் ஆகியவற்றுக்கு 2 லட்சம் திர்ஹம் வரை அபராதம் விதிக்கப்படும். அனுமதியின்றி வீட்டுப் பணியாளர்களை வேலைக்கு அமர்த்தினால் ஓராண்டு சிறைத் தண்டனையும் 2 லட்சம் முதல் 10 லட்சம் திர்ஹம் வரை அபராதமும் விதிக்கப்படும்.