மதீனா குபா மசூதியின் விஸ்தரிப்பு திட்டம் - கட்டிடங்களை காலி செய்வதற்கான கால அவகாசம் முடிவு!

மதீனாவில் உள்ள குபா மசூதியின் மேம்பாடு தொடர்பான பகுதியில் இருந்து கட்டிடங்களை காலி செய்வதற்கான காலக்கெடு முடிவடைந்தது. வரும் நாட்களில், திட்டப் பகுதியில் உள்ள கட்டடங்கள் இடித்து அகற்றப்படும் என கூறப்படுகிறது. சுமார் அறுபத்தாறாயிரம் பேர் பிரார்த்தனை செய்யும் வகையில் மசூதியின் மேம்பாட்டுத் திட்டம்  உருவாக்கப்படுகிறது.

கிங் சல்மான் திட்டத்தின் ஒரு பகுதியாக குபா மசூதி மேம்பாட்டுத் திட்டத்தை பட்டத்து இளவரசர் முகமது பின் சல்மான் கடந்த ரம்ஜானில் அறிவித்தார். இதற்காக, முதற்கட்டமாக திட்டப் பகுதியில் உள்ள சுமார் இருநூறு பேரின் கட்டிடங்கள் மற்றும் இடங்கள் அகற்றப்படும் என்று மதீனா பிராந்திய மேம்பாட்டு ஆணையம் ஏற்கனவே தெரிவித்திருந்தது. இவர்கள் வெளியேறுவதற்கான காலக்கெடு இன்றுடன் முடிவடைந்தது. அப்பகுதியில் மின்சாரம் மற்றும் குடிநீர் சேவைகள் அனைத்தும் துண்டிக்கப்பட்டுள்ளன. வரும் நாட்களில் கட்டடங்கள் இடித்து அகற்றப்படும் என மதீனா நகராட்சி தெரிவித்துள்ளது.

வெளியேற்றப்பட்டவர்களுக்கு இழப்பீடு வழங்குவதற்கான உரிமைச் சான்று மற்றும் இறுதி அனுமதிச் சான்றிதழை சமர்ப்பிக்குமாறு நில உரிமையாளர்களை ஆணையம் கேட்டுக் கொண்டுள்ளது. 

பேரீச்ச மரங்கள், விவசாய நிலங்கள் மற்றும் வரலாற்று இடங்களை பாதுகாத்து திட்டப் பகுதியை மேம்படுத்துவதே இதன் நோக்கமாகும். 

தற்போது 5,000 சதுர மீட்டராக உள்ள மசூதியின் கொள்ளளவை பத்து மடங்காக 50,000 சதுர மீட்டராக உயர்த்த மன்னர் சல்மான் இலக்கு வைத்துள்ளார். நபிகள் நாயகம் காலத்திலிருந்து பல்வேறு கட்டங்களில் உருவாக்கப்பட்ட குபா பள்ளிவாசல் வரலாற்றில் மிகப் பெரிய அபிவிருத்தித் திட்டம் இதுவாகும். இத்திட்டம் நிறைவடைந்தால், ஒரே நேரத்தில் 66,000 பக்தர்கள் வழிபட முடியும் என்பது குறிப்பிடத்தக்கது.